لماذا حمدي رزق؟؟

[mrmido]

بصراحة انا كرهت فقرة الصحافة بسبب الصحفي حمدي رزق
انا نفسي حد يجاوبني ليه حمدي رزق بالذات ؟؟
انا هقول رايي في اسلوب حمدي رزق وياريت تقولوا رايكم في فقره الصحافه في ثوبها الجديد وفي مقدم الفقرة
اولا: هو ثقيل الظل جدا جدا وبيستظرف كتير ومعروف ياجماعه ان خفة الظل والقبول دي من عند الله
ثانيا: لا يحترم عقليه المشاهد بتعليقاته السخيفة وفي الضيوف اللي بيستضيفهم في كثير من الاحيان
ثالثا: هو بصراحة بيفكرني باسلوب عمرو عبد السميع بتاع حالة حوار او معتز الدمرداش في موضوع الاستظراف ده
رابعا:مهنيا مينفعش المذيع يكون منحاز للحكومة ومواقفها زي الاستاذ حمدي رزق
انا رايي ان المفروض ان المذيع يكون محايد علي الاقل ويكون في صف الناس ويعبر عن رايهم زي ما عمرو بيعمل

ياريت تشاركوني الراي

[Action.Z]

من البداية و حمدى رزق اثبت فشلة و يكاد يكون هو البقعة السوداء فى فقرات القاهرة اليوم
لم أشاهد لة سوى فقرة واحدة لم أستطيع مقاومة النوم بسبب ملل تلك الفقرة نفسى كلنا نبعت لعمرو أس أم أس نقولة مش حمدى رزق اللى يتثبت مكان خيرى أى حد الا الراجل دة

[DR HOSSAM]

معاك كل الحق

[Mohamed Kareem]

انا كنت بفضل خالد صلاح عن حمدي رزق

[tarkieb]

ياراجل حرام عليك..ده من ساعة ماجه...وانا بنام نوم ...يعني برضة حاجة حلوة..انا اقترح انه يلبس بيجامة ويغير الفقرة الى القاهرة النوم علشان يبقي مفعوله زو قوة نوم ثلاثية..

[نانو]

بصراحه من ساعة مامشى خيرى وانا متفرجتش على فقره الصحافه خااااااااااااااااالص

لانى مش مقتنعه ان حد يقدمها غيره

وكنت بحب حمدى لما كان بيجى ضيف مره كل شهر ولا حاجه

[AHMED-AMER]

انا كنت بفضل خالد صلاح عن حمدي رزق

عندك حق يا كريم:)
بس احسن واحد كان بيقدم فقره الصحافه مع عمرو هو بلال فضل الراجل ده
بجد خسرنا اوي لما اجبر على انه يسيب القاهره اليوم
شكرا ليك
:bstwish:

[فاطمة الزهراء]

بصراحه وبكل احترام فقرة الصحافه فقدت بريقها لان طريقة تناول الاستاذ حمدى رزق للاخبار طريق غريبه علينا ونفسى اى حد فى البرنامج يسمع صوت الناس ويشوفوا بديل لتقديم فقرة الصحافه

[Xtreme]

بس احسن واحد كان بيقدم فقره الصحافه مع عمرو هو بلال فضل الراجل ده
بجد خسرنا اوي لما اجبر على انه يسيب القاهره اليومعـنـدك حق يا أحـمـد.
بلال ملهوش حل

[mrmido]

مش ملاحظين ياجماعة ان الكل متفق علي فشل حمدي رزق فشل ذريع في تقديم
فقره الصحافة

يعني بصراحة اللي يشوف فقرة الصحافة لوحدها يقول ان ده برنامج اسمه الحزب الوطني اليوم او الحكومة اليوم

والكل متفق ايضا ان بلال فضل هو الافضل لتقديم فقرة الصحافة وطبعا علشان هو اتشال لاسباب امنية
ليه مش خالد صلاح هو اللي يقدم الفقرة او اي صحفي تاني الا حمدي رزق واصدقاؤه من اصحاب الدم الخفيف والمنافقين للحكومه او اللي بيحاولوا يجملوا صورتها

والسؤال اللي عايز اعرفه:

عمرو او اداره البرنامج ازاي مش ملاحظه ان وجود الاستاذ حمدي رزق بيقلل من شعبيه البرنامج ؟؟
معقوله مش عارفين كل النقد اللي موجه لحمدي رزق من متابعي البرنامج ؟؟

بصراحه ان حاسس ان نبرة البرنامج كمان بقت اضعف كتير بعد موضوع الاستاذ بلال فضل

وعمرو حتي بقي كتير بيذكر الرئيس ويمدح فيه بداعي وبدون داعي مش عارف ايه السبب

مش عارف ده رد جميل ولا ايه؟؟
ولا انا ملاحظ حاجه محدش ملاحظها

[mrmido]

ياراجل حرام عليك..ده من ساعة ماجه...وانا بنام نوم ...يعني برضة حاجة حلوة..انا اقترح انه يلبس بيجامة ويغير الفقرة الى القاهرة النوم علشان يبقي مفعوله زو قوة نوم ثلاثية..


هههههههه

احسن تعليق سمعته علي فقرة الصحافة دلوقتي

ياريت نبعت الاقتراح ده للاستاذ حمدي رزق

واهو تغيير برضه ويمكن القنوات التانيه تقلده وتبقي موضه

[eman]

اكيد الجهات العليا اللي كانت خلف استبعاد بلال فضل هي اللي خلف وجود حمدي رزق في البرنامج

كل اللي قدموا فقره الصحافه بلا استثناء احسن منه سواء خالد صلاح او بلال فضل

[semsema]

اولا انا مش بتفرج على الصحافة من يوم ما خيرى ساب البرنامج ومشى
وعلى فكرة انا سمعت شائعات بس مش متاكدة منها انه حيرجع القاهرة اليوم تانى
لان برنامجه اتوقف بقرار من الوزير هو وكام برنامج فى محطات مختلفة
يارب يكون خبر رجوعه للقاهرة اليوم صحيح ونشوفه تانى
ميرسى على الموضوع

[فاطمة الزهراء]

سمسمه الجميله انا سمعت نفس الشائعه من كذا مكان وعلى فكره انا قلت اللى هتجيبى لنا المعلومه الصحيحه ايه رايكم نبحث وندور ونشوف الخير ده ايه صحته لان فعلا برنامج خيرى تم ايقافه يارب يعود للقاهره اليوم

[Shaymaa_AdeeB]

مش بتابعها دلوقتي نهائي... وبحس بملل فظيع لما بتيجي الفقرة دي
على أد ما كانت الفقرة دي ناجحة جدااا بخيري رمضان .. وكانت بتحاول تفضل على نفس المستوى بعد تركه البرنامج ...لكن دلوقتي أضبحت من أسوأ الفقرات بصراحة ... كل حاجة الأسلوب ..طريقة الطرح ..أوقات كتير بيخرج عن النطاق الطبيعي ويفضل يناقش الضيف وكأنه حوار عادي يعني عايز يعمل برنامج جوه البرنامج

بجد بقت تضايق جدااا فقرة الصحافة دلوقتي ..ويارب فعلا أن خبر رجوع خيري رمضان للقاهرة اليوم يكون حقيقي زي ما قالت سمسمه

شكرااا على موضوعك

[مروة عثمان]

انا ممكن اتفق معاك ان حمدى رزق مش بديل لخيرى دة كل الناس ملاحظاة لكن ان عمرو طريقتة اتغيرت او فى حاجة فى البرنامج لا بصراحة عمرو مش ممكن يتغير او يخاف دة اللى انا عارفاة وملاحظاة كويس اوى

[mrmido]

انا ممكن اتفق معاك ان حمدى رزق مش بديل لخيرى دة كل الناس ملاحظاة لكن ان عمرو طريقتة اتغيرت او فى حاجة فى البرنامج لا بصراحة عمرو مش ممكن يتغير او يخاف دة اللى انا عارفاة وملاحظاة كويس اوى


شكرا علي الرد

انا اقصد ان عمرو في معظم الحلقات اللي بينتقد فيها الحكومة بيحاول
يوضح انه مش ضد مبارك لان ده خط احمر طبعا
وعمرو مكنش بيعمل ده الاول
ولو شفتم حلقة وزير التضامن الاجتماعي مثلا
حتلاقوه ذكر مبارك بدون داعي وده بيحصل في كثير من الحلقات ولو تلاحظوا ثناء عمرو بشكل مبالغ فيه علي كلام بوش عن مبارك في مصر
ومواقف تانية كتير

انا اظن ان السبب ان مبارك تدخل عندما كان البرنامج قد يوقف او يتعرض لمشاكل

[ADEEBwbs]

اتفق معاك عمرو بقي بيقحم أسم مبارك كتيير وبالمدح طبعا
وغير كدا وجود مفيد فوزي أضاف للبرنامج توجه حكومي اكتر وحمدي رزق احيانا فقرتة بتكون مقبولة

[Hema]

بصراحه بقت فقرة مملله للغايه وبحس ان الاخ حمدى دة قاعد على كرسى متحرك من الشلل اللى هو فيه
وشنبه اللهم صلى على النبى بيتحرك بطريقه موسيقيه مع الكلام تحس ان صرصار بيلاعبلك شنباته
وعلى فكرة بعد بلاال فضل وخيرى رمضان الفقرة دى هاتبقا صعب جدا انى اى حد يقدمها بكفائه زيهم
شكرا ليك

[manses]

فقره الصحافه بقت ممله جدا والكتير مش بيشوفوها وفعلا حمدى رزق مش مكانه ده ولازم القائمين على البرنامج يغيروه بسره لان نزل فقره الصحافه الى مستوى هااااااااااااااااااااابط
ويريت يجيبوا بلال فضل لانه بصراحه اكثر من راااااااااااااااااائع

[manses]

فقره الصحافه بقت ممله جدا والكتير مش بيشوفوها وفعلا حمدى رزق مش مكانه ده ولازم القائمين على البرنامج يغيروه بسره لان نزل فقره الصحافه الى مستوى هااااااااااااااااااااابط
ويريت يجيبوا بلال فضل لانه بصراحه اكثر من راااااااااااااااااائع

[Nora Nasr]

الصحافة كانت فقرة خيري...و مش نافعة من غيره! بلال كان كويس بس كان كده كده حيقدمها يومين في الاسبوغ بس! فيا ليت يلغوها خالص احسن!

[marwa salih]

انا اكتر من انى اقرا عناوين الصحف وبعد كده مابقدرش اكمل فقرته ال(مهمه)ومش عارفه بصراحه كل حاجه فيها مهمه ليه؟
ضيفى المهم يقرأ العنوان المهم والجرنان المهم واالخبر المهم
وتيجى تدور على اى حاجه بتحصل مهمه مش بلاقى غير ان المهم انى اقلب القناه لغايه ما يهم ويمشى
وعقبال ما نسمع اهم خبر انه ساب البرنامج المهم

[hosseldesoky]

بصراحه البرنامج رتمه قل اوى بعد ما جه مفيد فوزى وعم حمدى رزق البرنامج كان فى الاول ايقاعه سريع خد وهات كده بسرعه سواء فى الفقرات او فى الصحافه
استاذ مفيد فوزى طبعا اعلامى كبير بس بصراحه مش متوافق خالص مع اسلوب عمرو خالص مفيد تقيل وعقبال ما يقول الكلمه ياخد ساعه وطبعا عمرو الكلام بيجرى منه والوحيد دلوقتى اللى بقا بياخد ويدى معاه فى الكلام عزت ابو عوف يعنى نوعا ما
بالنسبه للصحفى حمدى رزق بصراحه بيفكرنى بممدوح فرج بتاع المصارعه والطريقه اللى بيطلع الفاصل بيه ممله جدا وكمان مش بيقرا الصحف زى ما الفقره معموله عشان كده لا ده بيعمل حوار مع الضيف وكانه فى البرنامج وده مش الهدف من النص ساعه بتاعت الصحف اللى زمان كانت بتشدنا كلنا انما دلوقتى الطبعه الاولى احمد المسلمانى بصراحه غطى عليها خالص وياريت كان فضل فى البرنامج احسن ما مشى وعمل برنامج خاص بيه

[beba]

انا شخصيا زعلت جدا انة خيرى رمضان مشى من البرنامج لان انا شايفة انة خيرى اكتر واحد قدر يجارى عمرو اديب فى الكلام لان خيرى كان فاهم عمرو كويس و طبعا احنا عارفين ان عمرو مش اى حد يقدر يسد جنبة لانة باسلوبة المميز و خفة دمة بيقدر ياكل الجو و ياخد الحوار لصالحة و بالتالى يجذب المشاهدو انا شفت ان عمرو يوم ما اعلن رحيل خيرى كان باين انة متضايق . خيرى غلط انة ساب البرنامج لانة عشان يقدر يعمل برنامج بحجم القاهرة اليوم و القاعدة الجماهيرية دى محتاج سنين و بردة النجاح مش مضمون دة فى راى . لكن ما نقدرش ننكر ان خيرى ساب فراغ كبير فى فقرة الصحافة اما فيما يخص حمدى رزق انا شايفة ان كان هو ولا بلال فضل من قبلة مش على قد المستوى . الحاجة الى انا شايفاها بقت صعبة اوى هى استظراف و ضحك احمد موسى عمال على بطال من غير سبب لدرجة انة احيانا علشان يعمل ظريف يقل ادبة على الناس زى ما كانوا بيتكلموا على الحضرى لما راح سويسرا و قال على عبد المنصف انة بيصطاد سمك بصراحة انا زهلت منة . هو قبل كدة كان مكتوم ومكشر دلوقتى اتفتح بطريقة غريبة ما عندوش وسط .طب حمدى رزق لسة جديد و جايز ما اتعودناش علية لسة او دمة تقيل لكن احمد موسى اية وضعة.

[سندريلا]

الميزة الوحيدة في فقرة حمدي رزق هما ضيوفخه بيكونوا جامدين بصحيح
أنما أحسن واحد بيقدم الفقرة بعد خيري هو بلال فضل أكيد

[mrmido]

الميزة الوحيدة في فقرة حمدي رزق هما ضيوفخه بيكونوا جامدين بصحيح
أنما أحسن واحد بيقدم الفقرة بعد خيري هو بلال فضل أكيد


ممكن أكون متفق معاكي أن أحيانا حمدي رزق بيجيب ضيوف جامدين بس مش دائما الصحفي الكبير يكون قادر علي مواجهة الاعلام فالكلمة المكتوبة غير الاعلام المرئي وكمان علي رأي بلال فضل كلمة صحفي كبير دي بقت مشبوهة حبتين لأن معظم الجيل القديم من الصحفيين الكبار اللهم الا القليل ليس مواكبين للعصر بالقدر الكافي يعني عايشين لسه في قدر حرية الكلام المسموح به في عهد عبد الناصر يعني محافظين للغاية ونقدر نقول عليهم بيمثلوا الرأي الحكومي
ولما يجيب ضيف كويس بيبوظ الاستاذ حمدي الحلقة بتعليقاته الجميلة وخفة دمه الظاهرة وطرفه الرائعة وأسلوبه الرائع في ادارة الحوار وشياكته البادية ووجهه السمح المبتسم دائما ورغبته لاكثر فترة ممكنة في التواجد أمام الكاميرا لحبه لنا بالطبع بحيث يجب أن يتكلم أكثر من الضيف !!
شكرا لمرورك وتعليقك وشكرا لكل من مر وشارك ورد علي الموضوع

[alexandrin]

مش بفوت حلقة للقاهرة اليوم ....يس أيام خيرى رمضان كنت بفضل صاحى لغاية آخر الحلقة مهما طالت...الأيام دى و بالتحديد من ساعة ما شرف أبو دم تقيل بقيت فعلا أنام أول ما أشوف خلقته...ان كان صعب تغييره و مفروض غلى عمرو أديب يبقى الغاء فقرة الصحافة أكرم

[mrmido]

انا شخصيا زعلت جدا انة خيرى رمضان مشى من البرنامج لان انا شايفة انة خيرى اكتر واحد قدر يجارى عمرو اديب فى الكلام لان خيرى كان فاهم عمرو كويس و طبعا احنا عارفين ان عمرو مش اى حد يقدر يسد جنبة لانة باسلوبة المميز و خفة دمة بيقدر ياكل الجو و ياخد الحوار لصالحة و بالتالى يجذب المشاهدو انا شفت ان عمرو يوم ما اعلن رحيل خيرى كان باين انة متضايق . خيرى غلط انة ساب البرنامج لانة عشان يقدر يعمل برنامج بحجم القاهرة اليوم و القاعدة الجماهيرية دى محتاج سنين و بردة النجاح مش مضمون دة فى راى . لكن ما نقدرش ننكر ان خيرى ساب فراغ كبير فى فقرة الصحافة اما فيما يخص حمدى رزق انا شايفة ان كان هو ولا بلال فضل من قبلة مش على قد المستوى . الحاجة الى انا شايفاها بقت صعبة اوى هى استظراف و ضحك احمد موسى عمال على بطال من غير سبب لدرجة انة احيانا علشان يعمل ظريف يقل ادبة على الناس زى ما كانوا بيتكلموا على الحضرى لما راح سويسرا و قال على عبد المنصف انة بيصطاد سمك بصراحة انا زهلت منة . هو قبل كدة كان مكتوم ومكشر دلوقتى اتفتح بطريقة غريبة ما عندوش وسط .طب حمدى رزق لسة جديد و جايز ما اتعودناش علية لسة او دمة تقيل لكن احمد موسى اية وضعة.


مختلف معاكي في مسألة بلال فضل :
بلال ده شخص رائع جدا ورأيي أنه أفضل من خيري رمضان أو علي الأقل مش أقل منه وكما لما بيكون ضيف بيبقي أجمل وأجمل ويمكن ده اللي بيميز خيري عن بلال أنه أفضل كمقدم أو مذيع
أسلوبه جميل وساخر وفي المضمون بدون لف ولا دوران علشان كده تم استبعاده أمنيا لانه من معارضي مبارك بجد مش ضحك علي الدقون وهزار مش فقط معارض للحكومة لأنه بصراحة مبفهمش ازاي واحد يبقي معارض وفي نفس الوقت مؤيد لمبارك
مبارك رئيس الحزب الوطني والحكومة حكومة الحزب وهو أول واحد مسئول عن قراراتها مش بس رئيس الوزراء لاأن احنا في نظام رئاسي مش دستوري يعني صلاحيات رهيبة لرئيس الدولة
أما الأخ أحمد موسي ده مندوب أمن الدولة والداخلية في البرنامج علشان يعمل توازن ويبقي كل وجهات النظر ممثلة والبرنامج لا يتوقف..
شكرا

[mrmido]

مش بفوت حلقة للقاهرة اليوم ....يس أيام خيرى رمضان كنت بفضل صاحى لغاية آخر الحلقة مهما طالت...الأيام دى و بالتحديد من ساعة ما شرف أبو دم تقيل بقيت فعلا أنام أول ما أشوف خلقته...ان كان صعب تغييره و مفروض غلى عمرو أديب يبقى الغاء فقرة الصحافة أكرم


متفق معاك تماما
بس طالما الكل مش معجب بالاخ حمدي رزق
مفيش حد من الادارة يعرف يوصل وجهة نظرنا لادارة البرنامج أو لعمرو