منع بلال فضل من تقديم القاهرة اليوم من جهات عليا

[Mohamed Kareem]

مش عارف أأقول ايه بس انا بجد مستاء من الخبر دا لما قريتة من كام يوم نزلت خبر ان بلال فضل أنضم للقاهرة اليوم وتم الاتفاق علي الايام والمواعيد وكافة التفاصيل النهاردة بلال فضل قال مفاجأة وهو انه اتمنع من الظهور في القاهرة اليوم عن طريق جهات عليا في البلد
هو بلال فضل خطر للدرجادي وايه الحرية الجميلة اللى بلدنا فيها دي معني كدا انهم ممكن في أى لحظة يمنعوا عمرو اديب ولا ايه .. المهم بلال فضل قال الخبر دا بنفسة النهاردة وللاسف بلال فضل مش هيظهر تاني في القاهرة اليوم الا كضيف وعلي فترات بعيدة
ودا كلام الاستاذ بلال
http://img407.imageshack.us/img407/4314/belalvf3.png

[semsema]

والله انا مع احترامى الشديد لبلال فضل بس انا شايفة ان الحكومة مش عايزة حد يتكلم وعايزة الناس تفضل فى الحال اللى هى عليه كدة دايما وتلهيهم فى الدعم ورتفاع الاسعار وكدة
بس انا اصلا قولت رايى قبل كدة ان ممكن خالد صلاح يكون افضل من بلال فضل فى الصحافة وكلهم طبعا مش حيبقوا فى اسلوب استاذ خيرى المبدع اللى كان بيتحفنا بيه كل يوم

والسلام ختام

[AHMED-AMER]

والله انا مع احترامى الشديد لبلال فضل بس انا شايفة ان الحكومة مش عايزة حد يتكلم وعايزة الناس تفضل فى الحال اللى هى عليه كدة دايما وتلهيهم فى الدعم ورتفاع الاسعار وكدة
بس انا اصلا قولت رايى قبل كدة ان ممكن خالد صلاح يكون افضل من بلال فضل فى الصحافة وكلهم طبعا مش حيبقوا فى اسلوب استاذ خيرى المبدع اللى كان بيتحفنا بيه كل يوم


والسلام ختام


مع احترامي لرايك يا سمسمه بس انا شايف ان استاذ بلال فضل راجل محترم جدا وانسب واحد يتحط مع عمرو وان هما شلوه علشان فعلا بيتناقش وبيسخر من كل وضع مخل او منحل
وانا شايف ان استاذ خيري على اد مهو كان مبدع فعلا الا انه كان كافي خيره شره
يعني بالعربي اسوبه قوى
وده اللي خلى الحكومه تعمله حساب وتمنعه من تكمله اذاعه البرنامج
شكرا ع الخبر يا كريم وخبر بجد احزنني جدا
الواحد قال خلاص البرنامج بقى في ناس كفائه اخيرا بس اهوه مفيش حاجه بتكمل
:bstwish:

[TITO2M]

طيب ليه ؟؟؟
بس انا نفسي اسمع الرأي الأخر وياريت عمرو يتكلم على الموضوع ده
علشان ما نغيرش فكرتنا على القاهرة اليوم
شكرا يا محمد على الخبر

[shadowhisper]

لا حول ولا قوة الا بالله العلى العظيم
بجد .. ما ينفعش يتقال غير ان الا بيحصل ده تهريج
وزى ما فاروق جويده قال ..
والحلم مليك مطرود
لا جاه لديه ولا سلطان
سجنوه زمانا فى قفص
سرقوا الاوسمة مع التيجان .. وانتشروا مثل الفئران

شكرااااااا يا محمد

[semsema]

الواحد قال خلاص البرنامج بقى في ناس كفائه اخيرا بس اهوه مفيش حاجه بتكمل

:bstwish:

مع احترامى لرايك يااحمد بس مش لما يمشى واحد فى اسلوب خيرى وكفائته نقعد بقى نقطع فيه بقى
وبعدين انا مش عايزة اخرج عن الموضوع بس انا بردوا شايفة ان بلال فضل مش هو المناسب اصلا لفقرة الصحافة مع احترامى الشديد له يعنى

[فاطمة الزهراء]

على فكره احنا كنا بدأنا نعرف طريقة بلال فضل فى الكلام والتقديم
حاجه غريبه مش عارفه اقول ايه

[AHMED-AMER]

مع احترامى لرايك يااحمد بس مش لما يمشى واحد فى اسلوب خيرى وكفائته نقعد بقى نقطع فيه بقى
وبعدين انا مش عايزة اخرج عن الموضوع بس انا بردوا شايفة ان بلال فضل مش هو المناسب اصلا لفقرة الصحافة مع احترامى الشديد له يعنى

والله ده رايك :D
والاختلاف في الرآي لا يفسد في الود قضيه
وشكرا ليك يا سمسمه على ردك
بس انا متمسك برآي
:bstwish:

[Action.Z]

يا خساااااارة بلال فضل كان أضافة قوية للقاهرة اليوم
ربنا يوفقة بجد ميستهلش اللى حصل لة دة
شكرا يامحمد

[SARA]

ايه .... طيب يعنى ليه هو الراجل عمل ايه .... ومع احترامى لعمرو ماهو بيكلم بنفس اتجاه عمرو اشمعنى يعنى هو ....وهل السلطات العليا لها كلمه على برنامج فضائى وقناه سعوديه ...انها تقول مين يقدم ومين مايقدمش ..ودى نفس حالة ابراهيم عبسى لما كان بيقراء الصحف مع خيرى ..خساره

[NOHA]

ياخســــــــــــــــــــــــــــــــــاره

[savior]

شكرا يا محمد على الخبر بس والله محزن جدا جدا جدا
يعني ايه جهه عليا يا ريت عمرو يرد على الموضوع ليطمن قلوب المشاهدين والمتابعيين لانه الواحد ممكن يفكر تفكير مش كويس

[Shaymaa_AdeeB]

لا حول ولا قوة الا بالله

[pioneer]

تفاصيل الخبر من المصري اليوم

جهات عليا تمنع ظهور بلال فضل في برنامج «القاهرة اليوم» وبلال يعرض «بدلتين و٤ قمصان» للبيع في مزاد علني
كتب هبة حسانين ٧/١/٢٠٠٨

منعت «جهات عليا» ظهور الكاتب الصحفي والسيناريست بلال فضل في برنامج «القاهرة اليوم»، الذي تبثه محطة أوربت يوميا، بعد أن اتفقت إدارة المحطة معه علي المشاركة في تقديم البرنامج مع الإعلامي عمرو أديب يومين في الأسبوع «السبت والاثنين»، بعد أن ترك الإعلامي خيري رمضان البرنامج، منتقلا إلي قناة «الساعة» ليقدم برنامجا يوميا بعنوان «ساعة بساعة» مع المذيعة مي الشربيني، بدءاً من أول فبراير المقبل.
علمت « المصري اليوم» أن «جهات عليا» بالدولة استدعت إدارة محطة «أوربت»، وطلبت منها وقف إجراءات التعاقد مع بلال فضل، الذي كان سيقدم البرنامج وفقرة الصحافة يومين في الأسبوع، فضلا عن كتابة برنامج كوميدي أسبوعي، وقال المسؤولون للمشرفين علي أوربت إن ظهور فضل علي الهواء غير مسموح به، ولا مانع من كتابة البرنامج الكوميدي بشرط أن يكون مسجلا.
وعلمت «المصري اليوم» أن مسؤولي أوربت حاولوا التفاوض مع «الجهات العليا» التي أصدرت الأوامر، ولكن المسؤولين الذين التقوهم أجابوا بأنهم ليسوا مخولين بالتفاوض، وأن «الأوامر نهائية ولا رجعة فيها».
كان بلال قد ظهر في ثلاث حلقات الأسبوع الماضي، منها ليلة رأس السنة، واتسم أداؤه بالهدوء والتوازن والموضوعية. وتلقي بلال فضل اتصالا هاتفيا مساء الجمعة الماضي من إدارة أوربت، اعتذرت فيه عن عدم استمراره في البرنامج، رغم أنه سأل في بداية الاتفاق معه عما إذا كانت هناك مشكلة في ظهوره، فكان الرد «مفيش أي مشاكل». وقال بلال إنه وجه الشكر لإدارة المحطة، وأوضح لهم أنه «مستعد دائما لدفع ثمن مواقفه».
وأضاف ساخرا في تصريحات خاصة لـ «المصري اليوم»: «ما يحز في نفسي أن إدارة برنامج (القاهرة اليوم) خصصت لي (بدلتين و٤ قمصان) للظهور بها في البرنامج، لأنني اعتدت عدم ارتداء (البدل) والآن لم يعد لها فائدة، لذا فأنا أعرضها للبيع لدواع أمنية، والبدلتان والقمصان الأربعة بحالة جيدة.. استعمال مذيع لم يظهر علي الشاشة سوي ثلاث مرات».

[Nora Nasr]

يا خسارة بلال فضل كان اضافة قوية جدا للبرنامج...انا تنبات انه ممكن يعمل مشاكل للقاهرة اليوم بسبب ارائه و تعليقاته الساخرة و لكن لم اتوقع ان يمنع رسميا من الظهور! للاسف حتى اكثر المحطات حرية تواجه المنع ! لاحول ولا قوة الا بالله و مش عارفة الوضع حيكون ايه دلوقتي!

[freska]

بلال فضل كان الأفضل .............. بس للاسف بقى ... دة اصبح العادى ..........حاجة بقت تزهق

[eman]

لا حول و لا قوه الا بالله
هي دي مصر منبر الحريه....و حسبي الله و نعم الوكيل

الخبر في ظاهره ممكن يكون مش في صالحه ...بس هيخلي اللي ما يعرفش بلال فضل يحاول يعرف هو مين اكتر....و يتحب اكتر ...و الناس تتابعه اكتر و اكتر.... و اكيد لما يتعرف هيطلب في برامج تانيه ليس للجهات العليا اي اوامر عليها


و ربنا يوفقه و يعوض عليه

[beba]

يعنى لو بلال فضل الحكومة منعتة طيب عمرو اديب يعملوا فى اية
يعنى هو كان قال و لا عمرة هيقول راى اكثر جراة من عمرو